Seryusohon sa National Bureau of Investigation- Central Visayas, pag-imbestigar ug pagpasaka ug kaso sa mga indibidwal nga masakpan nga nagpakatap ug nagkadaiyang hulga sa mga tunghaan diri sa Dakbayan sa Sugbo.
Sa pagpakig-alayon sa Cebu City Police Office, nga maoy manguna sa pagresponde, muabag sa pagpahugot sa imbestigasyon sa mismong mga kaso ang NBI-7.
Kini ang gibutyag ni Gregorio Algoso Jr. ang Supervising agent sa NBI-CEVRO, atol sa pagpakighinabi sa mga sakop sa tigbalita, nga angayan nga seryusohon sa NBI CEVRO lakip na ang mga law enforcement Agencies ang nahitabo karon nga mga hulga sa siyudad.
Gihimug-atan usab ni Algoso, nga sigurado gayud nga mapasakaan ug tukmang kaso ang mgpasiugda ug mga “bomb ug shooting threats”.
Ang maong mga lakang gipahugtan human sa sunod-sunod nga mga hulga sa siguridad nga nadawat sa mga nagkadaiyang tunghaan, lakip na ang usa ka dakong Mall sa Cebu City.
