Taliwala sa inanay nga pagbalik sa normal nga kalidad sa hangin ug padayong nakaapekto nga ashfall tungod sa pagbuto sa Mt. Kanlaon, kanselado gihapon ang tanan nga mga klase sa Dakbayan sa Talisay, kini aron malikayan ang kadaot mugna sa mga abo gikan sa bulkan.
Mao kini ang gibutyag ni Alvin Santillan, ang Disaster Risk Reduction Officer sa Dakbayan sa Talisay, sa pagpakighinabi sa Bombo Radyo Cebu nga matud pa, padayung gipatuman sa kagamhanan sa dakbayan ang kanselasyon sa mga klase aron paglikay sa mga kadaot.
Kanselado usab ang mga outdoor activities ug sa mga nagkalain-laing sports nga ipahigayon sa gawas, lakip usab ang mga indoor sports gumikan kay makasulod ra gihapon ang mga abo ug aron paglikay sa mga apektadong residente.
Matud ni Santillan, nga mas grabe ang nasinati karon sa Dakbayan sa Talisay kon itandi sa nakalabay nga epekto sa ashfall ug haze, kini gumikan sa hangin nga dala sa Bagyong Inday ug sa Habagat, rason nga gidala kini paingun sa Sugbo, nga nakaapekto sa pipila ka lugar sa Probinsya.
Hinungdan nga usa sa mga lakang nga gipatuman sa kagamhanan sa Dakbayan mao ang pagdugang ug pagpang-apod-apud og mga facemask sa mga gingsakopan maoy giprayoridad alang sa paglikay nga mahanggab ang mga abog nga posibleng makadaot sa baga.
Samtang sa pikas bahin, gidili usab ang paglawig sa mga sakyanang pangdagat, subay na sa nasinati nga bati nga panahon mugna ni Bagyong Inday, samtang gipapangandaman na kagamhanan ang pagpabakwit sa mga residente nga anaa daplin sa Coastal Areas ug kasapaan.
