MANDAUE CITY, CEBU- Gipalig-on pa sa Mandaue District Hospital ang paghatag niini og serbisyong medikal ngadto sa publiko human gidugang ang lima ka mga espesyalista nga doktor sa maong tambalanan.
Sumala ni Dr. Ligaya Lakambini Dargantes, head sa Mandaue District Hospital nga kabahin kini sa padayon nga mga lakang sa pagpalambo sa kapasidad sa ospital aron mas daghan pang mga pasyente ang ilang maatiman.
Matod ni Dargantes, andam na karon ang ospital sa pagdumala sa mga emergency surgery ug uban pang mga minor surgical procedure tungod sa pag-abot sa mga bag-ong espesyalista ug sa pagpalig-on sa operasyon sa ilang surgical unit.
Gibutyag sa opisyal nga sa pagkakaron, anaa pa sa 30 porsyento ang operational capacity sa ospital, apan gilauman nga mosaka pa kini sa umaabot nga mga adlaw pinaagi sa pagpuno og mga medical specialist ug uban pang healthcare personnel.
Sa pagkakarun, makahimo na ang Mandaue District Hospital sa pagpahigayon og hangtod sa 11 ka minor surgical procedures.
Tinguha karon sa maong tambalanan nga mapalapdan pa ang ilang mga serbisyong medikal, lakip na ang pagdumala sa mas komplikadong mga kaso, aron dili na kinahanglan nga ibalhin pa ngadto sa laing mga ospital ang ilang mga pasyente.
