Samdan sa ulo ang usa ka miyembro sa Philippine Navy human gibunalan og baton sa usa ka personahe sa Chinese Coast Guard (CCG).
Nahitabo ang insidente atol sa usa ka komprontasyon sa Ayungin Shoal sa West Philippine Sea niadtong Lunes, Hulyo 20.
Sumala sa Armed Forces of the Philippines (AFP), ang CCG sakay sa usa ka rigid-hull inflatable boat (RHIB) nga adunay walo ka personahe ug miduol sa BRP Sierra Madre, ang outpost sa militar sa Pilipinas sa Ayungin Shoal, diin ang CCG nagkuha og mga litrato ug video.
Tungod niini, giduol sila sa AFP sakay sa mga rubber boat aron papahawaon, apan ang Chinese Coast Guard nahimong agresibo ug kalit nga gibunalan ang usa ka miyembro sa Philippine Navy, nga miresulta sa kadaot sa ulo.
Ang insidente nakadaot usab sa mga rubber boat sa Navy.
Ang Western Command (WESCOM) naghatag dayon og medikal nga tabang sa mga nasamdan nga personahe.
Sigurado ang AFP nga gibuhat lang nila ang husto ug gisunod ang Rules of Engagement.
Padayon usab nga nanawagan ang AFP sa People’s Liberation Army (PLA), CCG ug Chinese maritime militia nga undangon ang ilang ilegal ug agresibo nga mga aksyon sa West Philippine Sea ug sundon ang 2016 Arbitral Award nga nagpamatuod sa mga katungod sa kadagatan sa Pilipinas ubos sa internasyonal nga balaod.
