Migasto na ang Estados Unidos og $37.5 bilyon alang sa nagpadayon nga gubat batok sa Iran, sumala ni Defense Secretary Pete Hegseth.
Agig tubag sa nagkadakong gasto sa operasyon militar, nangayo ang administrasyong Trump og dugang nga $87.6 bilyon nga pondo.
Sa maong kantidad, $67 bilyon ang ibutang alang sa mga operasyon sa Middle East, lakip na ang pagpuno sa kakulang sa mga bala, kagamitang militar, ug sweldo sa mga sundalo.
Sa iyang unang pag-atubang sa Capitol Hill sukad sa pagsugod sa gubat batok sa Iran aron hisgutan ang budget sa Pentagon alang sa sunod nga fiscal year, naputol ang testimonya ni Hegseth sa upat ka higayon sulod lamang sa tulo ka minuto tungod sa pagsinggit sa mga demonstrador.
Tungod sa kasamok, temporaryong gipahunong ni Senate Appropriations Committee Chair Susan Collins ang hearing aron hatagan og higayon ang Capitol Police sa pag-escort sa mga nagprotesta pagawas sa hearing room.
Gawas sa mga demonstrador, giatubang usab ni Hegseth ang mabangis nga pagsaway gikan sa pipila ka mga senador, lakip si Sen. Patty Murray, kinsa nagpasidaan nga ang panagbangi mahimong mosangpot na usab sa usa ka “tibuok kinabuhi nga gubat” nga hinay-hinay nang mawad-an og suporta gikan sa publiko.
