CEBU CITY- Gipahibalo ni Barangay Señor Santo Niño Kapitan Lourdes Ramirez sa iyang mga konstituwente ang istrikto nga pagpatuman sa “No Segregation, No Collection Policy” human sa tigum nga gipahigayon kagahapon uban ni Cebu City Mayor Nestor Archival.
Matud ni Kapitan Ramirez, sugod sa Lunes, Hulyo 27, dili na mokolekta ang barangay og basura nga wala ma-segregate.
Kabahin kini sa paningkamot sa lokal nga panggamhanan aron mapalambo ang husto nga pagdumala sa mga basura ug mapadayon ang kalimpyo sa komunidad.
Gibutyag usab niya nga adunay tulo ka garbage truck ang barangay nga motuyok sa upat ka sitio aron sa pagkolekta sa mga basura.
Ang mga basurang makolekta sa barangay direkta nang kuhaon sa private hauler, ug dili na kinahanglan nga ihatod pa sa South Road Properties (SRP), subay sa nasabutang kasabutan atol sa tigum uban ni Mayor Archival.
Gihangyo ni Kapitan Ramirez ang kooperasyon ug pagsabot sa tanang residente pinaagi sa husto nga pag-segregate sa ilang mga basura aron mapadayon ang kalimpyo ug kahapsay sa komunidad.
