CENTRAL VISAYAS- Pormal na nga gihamamat ug giabi-abi ang bag-ong Regional Director sa Bureau of Fire Protection–Central Visayas (BFP-7), FCSupt. Rodolfo P. Denaga, pinaagi sa usa ka formal interfacing nga gipahigayon gahapon huwebes, Hulyo 24, 2026.
Sa iyang mensahe atol sa seremonya, gibutyag ni Denaga ang pipila sa iyang mga prayoridad ug plano isip bag-ong Regional Director.
Matud niya, mahinungdanon ang paghatag og inspirasyon sa tanang miyembro sa kabomberohan aron madasig sila sa pagbuhat sa ilang katungdanan uban ang dedikasyon, integridad, ug kahusayan.
Dugang pa, usa sa iyang pangunang tumong sa pagpangulo sa BFP-7 mao ang padayon nga pagpalig-on sa pagsalig sa katawhan ngadto sa mga uniformed personnel.
Giingon niini nga ang suporta ug kooperasyon sa komunidad maoy usa sa mga haligi sa malampusong pagpatuman sa misyon sa BFP.
Samtang, gipahibalo usab sa BFP-7 nga padayon nilang pahugtan ang proseso sa pagpili sa 136 ka mga aplikante alang sa ranggong Fire Officer 1 (FO1).
Ang maong mga aplikante pagabahinon ngadto sa nagkadaiyang kategorya, lakip ang 42 ka miyembro alang sa Special Rescue Force, 36 alang sa Emergency Medical Service (EMS), ug 58 alang sa Fire Suppression Personnel.
Matud sa BFP-7, gibase ang maong pagbahin sumala sa kwalipikasyon, kahanas, ug gikatakdang tahas sa matag aplikante aron masiguro nga matagaan sila sa angay ug hustong posisyon.
