Gisugdan ni Senator-Judge Raffy Tulfo ang iyang interpelasyon sa saksi sa prosekusyon nga si kanhing COA State Auditor Atty. Roderick Wamil sa ika-13 nga adlaw sa impeachment trial ni Vice President Sara Duterte Miyerkules, Agosto 5, 2026.
Sa wala pa ang pagpangutana, nagpahayag una si Tulfo og punto bahin sa giingong conflict of interest kalabot sa papel ni Atty. Michael Poa isip lead defense counsel.
Gikuwestiyon ni Tulfo ang iyang pag-apil human gipadayag sa miaging hearing nga si Poa usa sa nakigkita sa mga opisyal sa COA.
Apan giklaro ni Trial Presiding Officer Francis “Chiz” Escudero nga si Vice President Sara Duterte ang respondent sa kaso ug dili si Poa, busa walay conflict of interest.
Lakip sa iyang gipangutana kang Wamil mao kung adunay ubang ahensya sa gobyerno nga nagsumite og mga katingad-an nga ngalan o alyas sama sa “Chichiria” sa paggamit sa confidential funds.
Mitubag si Wamil nga dili matino gikan lamang sa mga dokumento sa COA kung ang mga ngalan tinuod ba o mga alyas tungod kay wala kini gipahayag sa mga gisumite nga rekord.
Gipangutana usab ni Tulfo kung mahimong makompromiso ang seguridad sa mga impormante kung pangayuan og mga resibo ang ilang transaksyon.
Mitubag si Wamil nga ang COA nangayo og opisyal nga mga resibo ug invoice isip dokumentasyon sa mga gipamalit.
Gisalikway usab ni Wamil ang argumento nga ang pagpangayo og maong mga dokumento mahimong hulga sa nasudnong seguridad, ug miingon nga ang maong mando giwagtang na.
