Nangayo og pahimangno si Senator-judge Raffy Tulfo alang sa tigpamaba sa Senate Impeachment Court nga si Atty. Reginald Tongol, human kini misulti sa media nga gilauman nga ipagawas sa Disyembre 16 ang desisyon sa impeachment trial ni Bise Presidente Sara Duterte.
Gihimo ni Tulfo ang panawagan taliwala sa naunang pahimangno sa korte ngadto sa mga tigpamaba sa prosekusyon ug panel sa depensa nga magmatngon sa ilang mga pahayag ngadto sa media.
Matod ni Tulfo, adunay mga tawo nga nangutana kaniya sa miaging weekend human madungog ang pahayag ni Tongol nga adunay nang daan nga petsa alang sa pagpagawas sa pinal nga desisyon.
Samtang, gipatin-aw ni Senate Impeachment Court Presiding Officer Francis Escudero nga ang paghisgot ni Tongol sa Disyembre 16 gibase sa pre-trial order, nga naglatid sa iskedyul sa mga proceedings.
Matod ni Escudero, ang maong petsa nakuha pinaagi sa mathematical computation base sa 61 ka adlaw nga gipangayo sa prosekusyon alang sa pagpresentar sa ilang mga ebidensya ug 30 ka adlaw nga gipangayo sa depensa.
Bisan pa niini, mipadayon si Tulfo sa iyang panawagan ug miingon nga nasayop si Tongol sa makadaghang higayon sa iyang mga pahayag.
Matod pa niya, posible nga daghan og nahibaw-an si Tongol, apan adunay mga butang nga wala pa nahibaw-i sa mga senator-judge.
Gipahayag ni Tulfo nga nahibaw-an na lamang sa mga senator-judge ang maong impormasyon human kini gisulti ni Tongol sa media, nga iyang giingon nga daw “nag-una” kanila.
Mitubag si Escudero nga iyang “dawaton ug konsiderahon” ang maong panawagan.
