Naglunsad ang mga awtoridad og dakong search and rescue operation human kapin sa 20 ka tawo ang gikataho nga nawagtang tungod sa grabeng pagbaha sa Grand Canyon sa Arizona.
Nahitabo ang insidente human sa kusog nga monsoon storm nga nagdala og halos usa ka pulgada nga ulan sulod lamang sa 30 minutos.
Tungod niini, kalit nga misaka ang tubig ug mikaylap ang lapok ug mga bato sa Bright Angel Creek ug Phantom Ranch.
Kapin sa 60 ka hiker ug residente ang luwas nga gipabakwit gikan sa mga apektadong lugar pinaagi sa koordinasyon sa National Park Service ug Arizona Department of Public Safety.
Tungod sa kusog nga baha, nadaot ang kadaghanan sa mga footbridge sa lugar, hinungdan nga temporaryong gisirhan ang Phantom Ranch, Bright Angel Campground, ug North Kaibab Trail.
Samtang nagpadayon ang pagpangita sa mga nawagtang, nakig-coordinate usab ang mga rescuer sa American Red Cross alang sa first aid ug uban pang tabang sa mga pamilyang naapektuhan sa insidente.
Nagpadayon usab ang Flood Watch sa amihanang Arizona tungod sa hulga sa dugang nga ulan nga mahimong hinungdan sa mas grabeng pagbaha ug pagdahili sa yuta sa mga canyon.
