Gipadayag ni Cebu Governor Pamela “Pam” Baricuatro atol sa iyang State of the Province Address (SOPA) ang mga nag-unang plano sa probinsya alang sa modernisasyon sa transportasyon ug ang pagpalambo sa limpyo nga enerhiya.
Lakip sa iyang pahibalo ang pag-instalar sa solar-powered smart waiting sheds nga adunay digital bus arrival displays ug charging stations, ingon man ang pagpaila sa mga electric bus sulod sa sunod nga 12 ka bulan pinaagi sa kooperasyon sa unom ka kooperatiba sa transportasyon.
Diin, gihatagaan usab niya og pagtagad ang pagdaladala sa maong serbisyo ngadto sa mga isla sa Bantayan ug Camotes aron mas magkahiusa ang mga dunggoanan, komunidad, ug mga tourist destinations.
Atol sa iyang pamahayag, gipasiugda sa Gobernadora nga ang tanang bag-ong proyekto sa imprastraktura sa probinsya kinahanglan nga bantayan aron masiguro nga kini makasugakod sa umaabot nga mga katalagman, labi na samtang nagpadayon ang pagbangon gikan sa mga natural nga katalagman sama sa linog sa North Cebu ug Bagyong Tino.
Gihatagan sab og gibug-aton ang padayong suporta alang sa mga renewable energy projects aron makadawat ang Sugbo og mas limpyo, kas anyaran, ug molungtad nga suplay sa kuryente.
Gipasabot usab ni Gobernador Baricuatro nga ang tanang gisaad nga mga proyekto dili lamang mga ideya o damgo apan pormal nga mga pasalig nga adunay gitakdang mga timeline, target, ug mga tawo nga manubag sa ilang pagpatuman.
Giawhag ang mga Sugbuanon nga sa sunod tuig, dili na kinahanglan nga pahinumdoman sila sa mga saad apan ipakita ang tinuod nga mga nahimo alang sa mas andam, nahiusa, ug mapinanggaon nga Sugbo.
