Dili ‘satisfied’ si Cebu City Councilor Joel Garganera sa paglibkas sa cease and desist order batok sa Binaliw Landfill, diin gipahayag niya ang iyang lawom nga kabalaka bahin sa kaluwasan ug kasegurohan sa lugar.
Atol sa pakighinabi sa Bombo News Team, kang Konsehal Garganera gisaysay niini nga dili pwedeng basta-basta na lang ipadayon ang operasyon ug pagpundok sa basura sa ibabaw nga bahin nga wala pa matuman ang saktong remediation ug rehabilitation aron masiguro ang kaluwasan sa estruktura.
Sumala sa konsehal, ang kasamtangang kahimtang sa landfill daw sama sa langob sa ubos o tiilan sa usa ka bukid nga posibleng magdala og dakong peligro. Hinungdan, nipasidaan kini hilabi na nga nagsing-abot na usab ang tag-ulan nga aduna’y dako nga hulga nga ang gibukid nga basura, mosuyop ug magsilbing “sponge’ nga mopa-ugkat ug mopahuyang nga mamahimong subling disgrasya o pagdahili.
Tungod niini, gipasalig ug gipahimangnoan ni Garganera ang mga awtoridad ug ang tagdumala sa pasilidad nga unahon ang kaluwasan sa katawhan ug sa palibot sa dili pa ipadayon ang normal nga operasyon.
