2 ka piloto patay human sa nahitabong air show jet crash sa Greece

Patay ang duha ka piloto human na-crash ang usa ka Phantom F-4 jet samtang gihimo ang usa ka air show sa Tanagra Air Base sa Athens Greece niadtong Setyember 5.

Nahagsa ang naasoy nga fighter jet pipila lang ka gatos ka metros gikan sa mga saksi.

Gibana-banang anaa usab sa libo ang mitambong sa air show niadtong adlawa ug maayo nalang nga walay natalang na-angol. Sumala sa airforce officials sa Greece, nakit-an ang lawas sa duha ka namatay nga piloto sa Tanagra Air force base, 60 kilometers north of Athens.

Migamit usab og 11 water-dropping planes ug nagtinabangay ang 85 ka mga bumbero aron mapukan ang sunog human nahagsa ang eroplano.

Gilayon usab nga gikansela sa mga organizers ang pipila ka events alang unta sa sunod semana.