Nabalintong ang usa ka pick-up truck human nabangga sa usa ka SUV sa intersection sa Junquera Street ug P. del Rosario Street sa University of San Carlos – Main Campus sa Cebu City niadtong Miyerkules sa hapon, Setyembre 9.
Gikataho nga ang SUV sakay sa mga miyembro sa Cebu City Fire Station nga miresponde sa naunang sunog sa Visayas Command, Brgy. Apas ug giingong gi-activate sa mga bombero ang alarma sa SUV aron pasidan-an ang ubang mga motorista samtang nagkaduol sila sa interseksyon.
Apan, kuha sa cctv footage ang pagbangga tali sa SUV ug pickup truck, nga hinungdan sa dakong impact niini nga miresulta sa pagkabalintong sa pickup truck.
Dali usab nga gidala sa mga awtoridad ang sulod sa pickup truck sa pinakaduol nga tambalanan alang sa medikal nga atensyon. Samtang, nakahiagom usab og angol ang mga bombero nga sakay sa SUV sa nahitabong aksidente.
