Gihulagway ni Deputy Speaker Janette Garin nga “medyo bastos” ang paagi sa pag-cross-examine ni defense lawyer Mark Vinluan kang kanhi Sandiganbayan Justice Amparo Cabotaje-Tang, kinsa nagsilbi isip expert witness sa prosekusyon sa impeachment trial.
Nagkanayon si Garin nga nakurat siya sa pamaagi ni Vinluan, ilabi na sa mga pangutana niini kung sakop ba si Cabotaje-Tang sa grupong “Kakampink” o usa ba ka hugot nga tigpaluyo ni Duterte.
Gipasiugda ni Garin nga isip usa ka babaye, wala siya makauyon sa maong matang sa pagpangutana, ilabi na kay anaa ang kanhi justice aron mohatag og eksperto nga pagpasabot sa balaod base sa iyang kasinatian.
Gipasiugda usab ni Garin ang taas nga rekord sa serbisyo publiko ni Cabotaje-Tang ug ang kamatuoran nga nagpabiling limpyo ang iyang integridad.
Samtang, gidayeg ni Garin ang kanhi justice tungod sa pagpatin-aw niini sa konsepto sa “unexplained wealth” ug sa kamahinungdanon sa sinumpaang Statement of Assets, Liabilities, and Net Worth (SALN).
Matod niya, walay problema sa mga pondo nga makita sa bank account sa usa ka opisyal sa gobyerno, basta mapamatud-an ang legal nga gigikanan niini ug nahiuyon kini sa gideklarar nga bahandi sa opisyal.
