Gihimakak sa kampo ni kanhi House Speaker Lord Allan Velasco ug ni Vice President Sara Duterte ang mga alegasyon ni kanhi Police Corporal Rodulfo Gracioso Jr. nga nakahatod siya og mga maleta nga adunay kwarta ngadto sa pipila ka mga personalidad, lakip si Duterte.
Matud ni Atty. Rowell Ilagan, tigpamaba ni Velasco, walay basehan ug adunay mga panagsumpaki ang mga alegasyon ni Gracioso.
Giawhag usab niya ang publiko nga magmatngon sa pagdawat sa maong mga pahayag.
Samtang, gihimakak ni Duterte nga nakaila siya kang Gracioso o nakadawat og kwarta gikan niini.
Matud niya, naghulat ang iyang mga abogado sa opisyal nga kopya sa affidavit aron ilang matuki ang mga alegasyon ug posibleng legal nga aksyon.
Sa iyang affidavit, giingon ni Gracioso nga nakahatod siya og kapin P2 bilyon kang Duterte sa kapin 20 ka higayon, apan wala pa kini mapamatud-an sa korte.
Ang National Bureau of Investigation nagpadayon sa pag-imbestiga sa iyang mga alegasyon.
Gikumpirma usab ni Justice Secretary Fredderick Vida nga nadawat na sa Department of Justice ang affidavit ni Gracioso ug gisusi na kini.
