Gihagit ni Interior Secretary Jonvic Remulla si kanhi House Speaker Lord Allan Velasco ug iyang asawa nga mobalik sa Pilipinas ug magpailalom sa polygraph o lie detector test.
May kalabotan kini sa mga alegasyon ni kanhi pulis nga si Rodulfo Gracioso Jr. nga naghatod siya og kapin P2 bilyon nga kwarta ngadto sa mga miyembro sa pamilyang Duterte, nga giingong subay sa mando ni Velasco.
Matod ni Remulla, ang magtiayon giingong anaa sa Niseko, Japan.
Giawhag niya sila nga moagi sa susamang polygraph test nga gipailalom kang Gracioso.
Sumala sa NBI, miagi na sa ikaduhang polygraph test si Gracioso niadtong Septiyembre 30.
Apan padayon pang giimbestigahan ug gi-verify sa mga awtoridad ang iyang mga alegasyon.
Samtang, gilimod sa kampo ni Velasco ang mga alegasyon ug miingon nga wala kini’y basehan.
Giklaro usab nga ang resulta sa polygraph dili mahimong gamiton isip konklusibong ebidensya sa pagkasad-an o pagka-inosente sa korte, base sa mga desisyon sa Korte Suprema.
