Gibutyag ni Assistant Ombudsman Mico Clavano nga kusganong supakon sa mga piskal ang mosyon ni kanhing House Speaker Martin Romualdez, ilabina ang iyang hangyo may kalabotan sa lugar sa iyang detention tungod sa giingong mga balatian.
Sumala ni Clavano, hangyoon sa mga piskal nga dili lamang usa ka doktor, kondili usa ka grupo sa mga doktor sa gobyerno, ang mo-assess kung ang mga balatian ni Romualdez nagkinahanglan ba og pag-confine sa ospital o mahimong matambalan isip outpatient.
Kung mapamatud-an nga dili kinahanglan ang pag-confine, mosugyot ang mga piskal nga ibalhin siya sa regular nga detention facility, sama sa ubang mga akusado sa mga kasong dili mahimong piyansahan.
Sa pikas bahin, naglaom si Interior Secretary Jonvic Remulla nga aprobahan sa Sandiganbayan ang ilang mosyon nga ibalhin si Romualdez ngadto sa Philippine National Police o PNP General Hospital.
Matod ni Remulla, adunay parehas nga kapasidad ang PNP General Hospital sa pribadong ospital diin na-confine si Romualdez.
Gidugang niya nga ang iyang mga abogado ug mga membro lamang sa iyang pamilya ang tugotan nga mobisita kaniya.
Gimandoan usab ni Remulla ang mga opisyal sa New Quezon City Jail sa Payatas Road nga andamon ang selda ni Romualdez.
