Naglaum ang Senate Impeachment Court nga daling masulbad sa Korte Suprema (SC) ang mga petisyon nga nagkuwestiyon sa desisyon niini nga usbon ang basehan sa ihap sa boto nga gikinahanglan aron makombikto o ma-acquit si Bise Presidente Sara Duterte.
Matod pa sa tigpamaba sa impeachment court nga si Atty. Reginald Tongol, ang Presiding Officer nga si Senator-Judge Francis “Chiz” Escudero ug ang tibuok impeachment court nagpaabot nga magpagawas og desisyon ang SC sa dili pa mobotar ang mga senator-judge alang sa kataposang hukom sa kasong impeachment.
Gihatagan niya og gibug-aton ang kamahinungdanon sa pagsulbad sa maong isyu sa dili pa ang kataposang botasyon aron malikayan ang sitwasyon diin nakapagawas na og desisyon ang impeachment court samtang nagpabiling nagbitay pa sa SC ang hisgutanan bahin sa balidad sa gikinahanglang gidaghanon sa boto (voting threshold).
Kahinumdoman nga sa desisyon niini niadtong Setyembre 23, gipamatud-an sa impeachment court pinaagi sa botong 13-0 nga ang gikinahanglang “two-thirds” nga boto ibase sa mga senador nga legal ug actual nga makapartisipar sa pagdungog.
Tungod niini, giusab ang naunang gikinahanglan nga 16 ka boto, ug gihimo kining nagdepende sa gidaghanon sa mga senator-judge nga kwalipikadong moapil sa panahon sa kataposang hukom.
Samtang, duha ka managlahing petisyon ang gipasaka sa Korte Suprema aron kuwestiyonon ang maong desisyon.
Ang kanhi Executive Secretary nga si Victor Rodriguez ang unang mipasaka og Petition for Certiorari and Prohibition niadtong Septiyembre 24, diin mihangyo usab siya og temporary restraining order batok sa pagpatuman sa bag-ong lagda sa botasyon.
Sa laing bahin, si Atty. Ernesto Francisco Jr. mipasaka og petisyon niadtong Septiyembre 25, nga naghangyo sa SC nga ideklarar nga unconstitutional ang desisyon sa impeachment court ug magpagawas og Status Quo Ante Order aron hunongon ang pagpatuman niini. Sa pagkakaron, nagpahayag ang impeachment court nga magpadayon ang husay samtang walay mando gikan sa Korte Suprema nga nagmando sa pagsuspende niini.
