Namatay ang duha ka turistang Pilipino ug walo pa ang nakaangkong og hilabihan nga kaangol human natumba ang bus nga ilang gisakyan samtang padulong sa Oktoberfest sa Munich, Germany, gahapon, Domingo.
Gibanabana nga anaa sa 50 ka Pilipino ang sakay sa bus nga nagbiyahe gikan Milan paingon sa Munich sa dihang naaksidente ug natumba kini duol sa lungsod sa Buchloe.
Dul-an sa 250 ka emergency personnel ang gipadala ngadto sa lugar sa insidente, nga misangpot sa temporaryong pagsira sa highway sa duha ka direksyon.
Nagpahayag og dakong kasubo ang Philippine Consulate General sa Frankfurt ug nakig-alayon sa mga awtoridad sa Germany alang sa pagkumpirma sa identidad sa mga biktima.
Samtang, nagpahayag usab og pakigduyog ang Philippine Consulate General sa Milan ug nagpagawas og hotline alang sa mga pamilya nga nanginahanglan og impormasyon bahin sa ilang mga kaliwat.
Nagpadayon usab ang mga opisyal sa Pilipinas sa pagmonitor sa kahimtang sa mga nasamdan ug naglaum sa ilang dali ug hingpit nga pagkaayo.
