Gipahugtan sa Pilipinas ug Timor-Leste ang ilang kooperasyon sa higher education pinaagi sa pagpirma sa usa ka Memorandum of Understanding (MOU) nga nagtumong sa pagpalapad sa mga oportunidad alang sa mga estudyante, magtutudlo, researchers, ug mga institusyon sa duha ka nasod ning adlaw nga Huwebes, Oktubre 1, 2026.
Sumala ni Commission on Higher Education (CHED) Chairperson Dr. Shirley C. Agrupis, ang partnership tali sa Pilipinas ug Timor-Leste nagpadayon na sulod sa hapit duha ka dekada.
Gipadayag ni Agrupis, nga sukad sa kasabutan sa academic cooperation niadtong 2008, kapin 200 ka Timorese scholars ang natabangan nga makatuon sa Pilipinas, samtang 126 ka Timorese students ang kasamtangang naka-enroll sa mga Philippine higher education institutions.
Ubos sa bag-ong MOU, gipalapdan ang mga natad sa kooperasyon lakip ang academic mobility, scholarships, research, quality assurance, curriculum development, credit transfer, ug institutional partnerships.
Gidugang ni Agrupis lakip sa gitan-aw nga mga oportunidad alang sa Timor-Leste mao ang pagpadayon sa advanced studies ug professional training sa Pilipinas, ilabi na sa medicine ug uban pang health-related fields.
Alang sa Pilipinas, gilauman usab nga molapad ang research collaboration, faculty ug student mobility, ug institutional engagement uban sa mga unibersidad sa Timor-Leste.
Lakip sa mga hisgutan mao ang gisugyot nga partnership tali sa University of the Philippines ug National University of Timor-Leste, mga oportunidad alang sa mga Timorese students ug doctors nga makapadayon og edukasyon ug medical training sa Pilipinas, ug posibleng kooperasyon tali sa Mariano Marcos State University ug Timor-Leste sa scholarships, academic mobility, research, ug capacity-building.
