Nagpaabot og pahasubo ang Philippine Sports Commission (PSC) sa kalit nga kamatayon sa duha ka estudyante-atleta sa Ateneo de Manila University nga sila si Divine Adili, 21, ug Rene Clert Baterbonia, 19, nga namatay atol sa usa ka team-building activity sa Dipaculao, Aurora.
Sumala sa PSC, nakig-coordinate na sila sa mga awtoridad nga nag-imbestigar sa insidente aron mahibal-an ang tinuod nga kahimtang sa nahitabo ug masuta ang posibleng mga kakulangan sa safety measures atol sa maong kalihokan.
Gipahibalo usab sa ahensya nga maghimo sila og sports stakeholders’ panel kauban ang Samahang Basketball ng Pilipinas (SBP), UAAP, Commission on Higher Education (CHED), ug National Youth Commission (NYC).
Tumong niini nga grupo ang pagrepaso sa kasamtangang mga polisiya ug mga protokol sa pagbansay ug kaluwasan sa mga atleta, ilabi na sa mga outdoor ug team-building activities.
Giingon sa PSC nga ang lakang nagtinguha nga mapalig-on pa ang mga safety protocols sa sports programs aron mapugngan ang pag-usab sa susamang trahedya, samtang gipadayon ang disiplina ug performance standards sa mga estudyante-atleta.
Nagpabilin karon nga gipadayon ang imbestigasyon sa mga awtoridad sa nahitabo.
