Gipapauli og sayo kagahapon, Huwebes, Oktubre 1, ang mga tinun-an sa Don Sergio Osmeña Sr. Memorial National High School sa Barangay Labangon, Siyudad sa Sugbo, human adunay “bomb threat” nga gi-post sa sa social media.
Gikataho nga usa ka account nga ginganlan og “Carlos McGregor” ang nag-post niadtong gabii sa Miyerkules, Septiyembre 30, nga nag-ingon nga adunay ipadala nga bomba sa eskwelahan ug pusilon ang mga estudyante sa Senior High School.
Gitaho ni Principal Marlon Toyco Coniconde ang maong hulga ngadto sa Labangon Police Station sa alas 11:40 sa gabii. Gisusi sa kapulisan ang campus sa alas 12:30 sa kaadlawon sa Huwebes ug walay nakitang kadudahang mga butang. Pagka-alas 8 sa buntag, nagpahigayon og ikaduhang pagsusi ang Explosive Ordnance Disposal Unit 7.
Matod sa eskwelahan, nga base sa mga pagsusi, luwas ra ang campus, apan gipapauli gihapon ang mga estudyante isip pag-amping.
Nakamugna ang maong insidente og kahadlok ug kalibog sa mga tinun-an, magtutudlo, ug mga residente sa palibot.
Daling nagpahigayon og imbestigasyon ang PNP Regional Anti-Cybercrime Unit 7, ug base sa ilang pasiunang nakita, ang account nga Carlos McGregor usa ka dummy profile nga gigamit sa paghimo sa maong hulga.
Gisubay karon sa mga awtoridad ang digital footprint sa maong account aron mailhan ang tawo nga nagpaluyo niini, samtang nagdeploy og dugang mga personahe ang Labangon Police Station aron magbantay sa eskwelahan, ug giawhag ang mga estudyante nga magpabiling kalmado.
Matud sa School Administrator nga ang kaluwasan sa ilang mga estudyante ug kawani mao gihapon ang ilang prayoridad, samtang nanawagan usab sila sa publiko nga dili magpakatap og impormasyon nga wala pa mapamatud-i.
