CENTRAL VISAYAS- Nagpasidaan ang PAGASA nga posibleng mosamot ngadto sa Very Strong El Niño ang kasamtangang El Niño sa Tropical Pacific sa katapusan sa 2026 ug magpadayon hangtod sa unang tunga sa 2027.
Matud ni Jhomer Eclarino, Weather Specialist sa PAGASA Mactan, anaa na karon sa Strong El Niño category ang Tropical Pacific ug posibleng mosulod sa Very Strong category tali sa Oktubre ug Disyembre.
Sa Central Visayas, gipaabot ang below normal ngadto sa near-normal rainfall, bisan pa nga posible gihapon ang localized thunderstorms ug panagsa nga pag-ulan.
Apan sugod Nobyembre hangtod Marso 2027, gipaabot ang mas dakong pagkunhod sa ulan nga mahimong makaapekto sa water supply, agriculture, irrigation ug food production sa rehiyon.
Posible usab ang pagsaka sa temperatura ug heat index, ilabina panahon sa dry ug hot season sa sunod tuig.
Gipahinumdoman ni Eclarino ang publiko sa nahitabo sa Cebu niadtong 2010, atol sa Strong El Niño, diin nakaabot sa 37 degrees Celsius ang air temperature ug 49 degrees Celsius ang heat index.
Tungod niini, iyang gi-awhag ang publiko nga likayan ang dugay nga pag-expose sa kainit, ilabina tali sa alas-10 sa buntag hangtod alas-4 sa hapon, ug sundon ang mga pahimangno sa Department of Health batok sa heat-related illnesses.
Gipasidan-an usab ang posibleng epekto sa El Niño sa water security, environment, marine resources, health ug energy sector, lakip ang mas taas nga risgo sa sunog tungod sa uga nga kondisyon.
Giawhag sa PAGASA ang publiko nga magtipid sa tubig ug kuryente ug, kung mahimo, magpraktis og rainwater harvesting panahon sa pag-ulan.
Gipahinumdoman usab ang publiko nga padayon nga bantayan ang mga update sa DOST-PAGASA ug sundon ang mga pahimangno sa mga lokal nga kagamhanan ug disaster managers.
