Nagpadala ang Philippine Coast Guard (PCG) og mga personahe ug barko aron moapil sa 24th Regional Marine Pollution Exercise (MARPOLEX) sa Bitung–Manado, North Sulawesi, Indonesia.
Mibiyahe ang grupo gikan sa Pier 13, South Harbor, Manila niadtong Oktubre 2 alang sa maritime exercise nga ipahigayon gikan Oktubre 8 hangtod 12.
Lakip sa mga barkong moapil ang BRP Gabriela Silang ug BRP Tubbataha, uban ang mga personahe gikan sa Marine Environmental Protection Command, Special Operations Force, Medical Service ug Nursing Service.
Tumong sa MARPOLEX nga palig-onon ang koordinasyon ug kahandam sa mga nasod sa pagtubag sa mga insidente sa oil spill, hazardous ug noxious substances, search and rescue operations, ug uban pang emerhensya sa kadagatan.
Pangunahan sa Directorate General of Sea Transportation sa Indonesia ang kalihokan, uban sa Japan Coast Guard.
Sumala sa PCG, makatabang ang exercise sa pagpalig-on sa regional cooperation ug kapasidad sa pagtubag sa mga insidente nga mahimong makaapekto sa marine environment.
