DOE, giingong walay epekto sa nasud ang export ban sa China

Giklaro sa Department of Energy (DOE) nga ang plano sa China nga export ban dili makaapekto sa suplay sa lana sa nasud.

Matod ni Energy Secretary Sharon Garin, nagtigom og stock sa lana ang China tungod kay dako nga bahin sa ilang mga reserba ang gipagawas na kaniadto.

Gipunting niya nga napamatud-an na nila ang sitwasyon uban sa mga kompanya sa lana ug nakita nila nga kini walay epekto.

Ingon man nga ang mga kompanya sa lana sa nasud adunay mga kontrata nga long-term o pang-taas nga panahon, nga hugot nilang gisunod.

Kahinumdoman nga mipahibalo ang China nga dili kini mag-eksport og lana ngadto sa ubang mga nasud tungod sa gipaabot nga pagsaka sa presyo nga dala sa nagpadayon nga panagbangi sa Middle East.