Gipahinumdoman sa mga sakop sa kapulisan partikular ni Patrolman Miguel Fajardo sa PNP DEG SOU-7 ang publiko nga kung adunay mohangyo kanila sa paghatod og parcel o pakete, angay nilang susihon ug beripikahon ang sulod niini aron malikayan ang dili tuyo nga pagdala og mga ilegal nga butang.
Kini human nga adunay Usa ka drayber sa motorsiklo nga pamasahero ang gidakop atol sa usa ka buy-bust operation nga gihimo sa mga awtoridad sa Arca Street, Barangay Mabolo, Cebu City, pasado alas 7:18 sa buntag niadtong Sabado, Oktubre 10, 2026.
Nasakmit sa mga awtoridad ang gibanabanang 41 ka kilo sa gituohang ilegal nga droga nga nagkantidad og P278.8 milyon.
Ang nasikop nga suspek giila nga si “Erwin,” 30 anyos, ug residente sa Barangay Basak Pardo, Siyudad sa Sugbo.
Matod sa PDEA-7, kini ang kinadak-ang kantidad sa droga nga nasakmit sa Central Visayas sukad niadtong 2016; gawas sa buy-bust money, nakuha usab ang usa ka cellphone, sakyanan, ug uban pang mga ebidensya.
Gihatagan usab og gibug-aton sa PNP DEG SOU-7 nga dili angay nga mosulay sa pag-apil sa mga ilegal nga kalihokan nga may kalabotan sa droga sa Siyudad sa Sugbo.
Matod pa sa mga awtoridad, ang maong mga kalihokan dili mosangpot sa maayong resulta; busa, mas maayo nga mangita og tarong ug legal nga panginabuhian.
