Gibutyag sa mga progresibong grupo diri sa Probinsya sa Sugbo, nga masulbad lamang ang padayun nga problema sa Haze sa lalawigan, kung aduna lamang tukma nga mga lakang o tinoud nga mga programa nga ipatuman alang sa pagpakigbatok sa air pollution.
Matud ni Teody Navea, Secretary General sa Sanlakas Cebu, nga dugay na nga misugyot ang mga progresibong grupo, hilabi na kadtong nagtan-aw sa kahimtang sa kalikopan sa pagdayag sa posibleng mga lakang aron masuta sa kagamhanan ang kahimtang sa air pollution, lakip na ang pagpa-instalar og mga ekipo aron masuta sa kalidad sa hangin.
Sigon niini, daghang mga rason ang posibleng nakahatag ug factor sa padayung pagkasinati sa Haze, sama nalang sa mga hugaw nga buga gikan sa mga sakyanan ug mga factory, nga usa sa mga gitan-aw gumikan sa paglambo usab sa lalawigan sa Sugbo.
Gihimug-atan ni Navea, nga mahinungdanon ang pagsusi pagbalik sa kagamhanan sa Urban Planning, aron masuta kung asa nga mga dapit ang sagad aduna nay grabeng epekto sa bati nga kalidad sa hangin, hilabina sa mga lugar nga paspas ang development.
Iyang gidugang, nga posibling mahisusama sa Bangladesh ang Sugbo nga adunay hugaw nga hangin gumikan sa mga pabrika ug ang padayung pagpasagad sa kahimtang sa kalidad sa hangin.
Matud usab ni Navea, possible gayud nga mosangpot gayud sa grabe nga epekto ang padayun nga pagbaliwala sa kagamhanan sa pagsulbad sa problema sa kalikupan, lakip na ang walay igo nga pagpatuman ug balaod sa pagpakigbatok niini.
