Gipasiugdahan ni Presidente Ferdinand “Bongbong” Marcos Jr. ang pagpalapad sa oportunidad sa desenteng trabaho alang sa matag Pilipino atol sa ika-26 nga National Public Employment Service Office kon PESO Congress.
Matud sa Presidente, lakip sa mga hagit nga angay sulbaron ang kakulang sa impormasyon bahin sa bakanteng trabaho ug ang dili pagkatakdo sa kahanas sa mga trabahante ngadto sa panginahanglan sa industriya.
Aron matubag kini nga mga hagit, gimandoan sa administrasyon ang nagkadaiyang ahensya sa gobyerno nga ipahiuyon ang mga programa sa pagbansay ngadto sa panginahanglan sa labor market.
Lakip sa gipaila sa mao ang TUPAD Flagship Innovations, nga naglakip sa Trabahong-Dagat alang sa mga komunidad nga nagsalig sa pangisda, SkillPass, nga nagdugtong sa trabaho ug sertipikasyon sa kahanas, ug Sagip-Trabaho, nga naghatag og temporaryong suporta sa sweldo sa mga trabahanteng naapektuhan sa kalisod sa negosyo.
Gipadayag usab ni Marcos nga kapin sa 14 milyong benepisyaryo ang nakadawat og emergency employment assistance ubos sa TUPAD sukad sa pagsugod sa iyang administrasyon hangtod Agosto 2026.
Samtang kapin sa 65,000 ka indibidwal ang nadawat dayon sa trabaho gikan sa 1,554 ka job fair nga gipahigayon sa Enero hangtod Agosto ning tuiga.
Kapin usab sa 111 mil ka estudyante nga out-of-school youth ang nakabenepisyo sa Special Program for Employment of Students sa unang unom ka bulan sa 2026.
Sa laing bahin, gipahibalo sa Presidente nga epektibo na kagahapong adlawa ang dugang nga 42 pesos sa inadlaw nga minimum wage sa mga sakop nga pribadong trabahante sa Central Visayas, ug 500 pesos sa binulan nga minimum wage sa mga katabang.
Bisan pa sa mga programa ug nahimong kalampusan, gibug-atan sa Presidente nga kinahanglan ipadayon ang panagtambayayong sa mga ahensya sa gobyerno, lokal nga panggamhanan ug pribadong sektor aron mas mapalapad ang oportunidad sa panginabuhian.
Gipasiugda usab sa Presidente, nga ang tumong sa administrasyon mao ang pagtukod sa usa ka Bagong Pilipinas diin ang matag Pilipino adunay patas nga kahigayonan sa pag-angkon og desente, lig-on ug malungtarong trabaho.
