Dili kombinsido si Cebu City Mayor Nestor Archival nga ang lokal nga tinubdan sa polusyon lamang ang maoy hinungdan sa nagkagrabeng bati nga kalidad sa hangin sa Dakbayan sa Sugbo.
Matod ni Archival, bisan og dako ang kontribusyon sa lokal nga polusyon, nagtuo siya nga posibleng adunay ubang hinungdan nga nakaapekto sa kahimtang sa hangin sa Metro Cebu.
Gipunting sa Mayor ang posibilidad nga ang polusyon gikan sa laing lugar mahimong makaabot sa Sugbo, human niya makuha ang impormasyon gikan sa iyang mga kaila sa nasud nga Singapore nga nakasinati usab og taas nga lebel sa polusyon tungod sa forest fires sa nasud sa Indonesia.
Apan, sumala sa Environmental Management Bureau o EMB-7, wala na giisip nga dakong hinungdan sa kasamtangang kalidad sa hangin sa Metro Cebu, ang aso gikan sa forest fires sa Indonesia, ilabina kay opisyal nang natapos ang habagat.
Gipasabot sa EMB-7 nga ang lokal nga kahimtang sa panahon maoy usa sa mga hinungdan sa pagtigom sa mga pollutant sa hangin. Ang bugnaw nga temperatura mahimong mopugong sa hugaw nga hangin nga mokayab, samtang ang hinay nga hangin makapalisod sa pagkatibulaag sa gagmayng partikulo sa polusyon.
Samtang, nagpatawag si Archival og tigom uban sa mga opisyal sa Cebu City Disaster Risk Reduction Management Office, school owners and administrators, mga grupo sa negosyante, City Health Department, Department of Health ug EMB aron magkauyon sa usa ka hiniusang lakang kon mosaka sa 150 ug 180 ang Air Quality Index o AQI.
Lakip sa gikonsiderar sa lokal nga pangagamhanan ang pag-apod-apud og face mask sa mga bata ug ubang residente isip panalipod batok sa polusyon, hilabina kon dili na mahimong isuspenso ang klase tungod sa dili maayong kalidad sa hangin.
