Nangulo si National Bureau of Investigation Director Atty. Melvin Matibag sa opisyal nga pag-abli sa ika-16 nga NBI Clearance center nga gitukod sa dakbayan sa Sugbo.
Kini nga satellite office kay kabahin sa pagpalapad sa serbisyo sa ahensya aron mas mapadali ang pagkuha og NBI clearance sa publiko.
Gipahayag ni Matibag ang iyang kinasingkasing nga pasalamat sa tanang nakig-alayon sa ahensya aron matuman kini nga proyekto. Iyang gipasiugda nga ang maong sentro gitukod aron mas mapaduol ang mga serbisyo sa gobyerno ngadto sa katawhan subay sa direktiba ni Presidente Ferdinand “Bongbong” Marcos Jr. nga himoong paspas ug sayon alang sa publiko ang pagkuha og clearance.
Gipatin-aw ni Matibag nga gikonsiderar sa NBI ang nahimutangan niini nga duol sa daghang mga opisina sa Business Process Outsourcing (BPO), diin daghang mga empleyado ug mga nangita og trabaho ang nagkinahanglan og mga clearance.
Kini nga inisyatibo kabahin usab sa mas lapad nga mga paningkamot sa NBI alang sa digitalization ug pagpalapad sa serbisyo lakip na ang e-clearance ug online renewal system nga gidesinyo aron dili na kinahanglan maghulat og dugay ang mga aplikante.
Gawas sa pagpauswag sa episyenteng serbisyo, gipasalig sa NBI Director nga ipadayon ug pakusgon pa sa ahensya ang ilang mga operasyon batok sa nagkalain-laing krimen sa nasud, sama sa ilegal nga droga, ilegal nga sugal, ug online o cyber-fraud.
Ingon man nga misaad usab siya nga ang nasudnong gobyerno makig-alayon sa mga lokal nga unit sa gobyerno ug sa pribadong sektor aron panalipdan ang seguridad sa nasud ug itanyag ang kaayohan sa katawhang Pilipino.
Sa pikas bahin, gipahibalo usab ni Matibag nga ang ilang mga imbestigasyon naglangkob sa nagkalain-laing lugar sa tibuok nasud, lakip na ang Bicol, Calabarzon, Cebu, ug Davao.
Matod ni Matibag, aduna nay 26 ka mga kaso nga napasaka na ug wala na ubos sa ilang hurisdiksyon. Samtang, aduna pay 27 ka dugang nga mga kaso nga kasamtangang gi-imbestigahan, uban sa laing 47 ka mga kaso diin upat niini, nga gikan sa Davao, ang napasa na ngadto sa Department of Justice (DOJ).
Giklaro usab sa opisyal nga walay mga kongresista nga nalambigit sa mga kaso nga pormal nang napasaka, ug kadaghanan sa mga indibidwal nga gipasakaan og kaso mga empleyado sa Department of Public Works and Highways (DPWH) ug mga pribadong kontraktor. via Bombo George Lastimosa
