Gi-renew sa aktres nga si Nadine Samonte ug sa iyang bana, ang negosyanteng si Richard Chua, ang ilang mga panaad sa kasal o wedding vows atol sa usa ka simpleng seremonya sa Tagaytay, isip pagtimaan sa ilang ika-13 nga anibersaryo sa kasal.
Ang magtiayon unang nagpakasal niadtong Oktubre 2013 sa usa ka pribadong seremonya nga gipahigayon sa umahan sa inahan ni Chua—ang beteranang aktres nga si Isabel Rivas— sa Iba, Zambales.
Kauban sa magtiayon niining espesyal nga adlaw ang ilang tulo ka mga anak nga sila si Heather (10 anyos), Titus (7 anyos), ug Harmony (4 anyos), uban sa ilang suod nga mga paryente ug higala.
Lakip sa mga bisita sila si Rivas, ang ig-agaw ni Chua nga si Marco Gumabao, ug uban pang mga sikat nga personalidad sama nila ni Lorna Tolentino, Cory Quirino, Yasmien Kurdi, Joko Diaz, ang basketbolistang si Rico Maierhofer ug ang asawa niini nga si Jeck, Yassi Pressman ug ang iyang pamanhunon nga si Luigi Villafuerte, ingon man si Miguel Villafuerte ug ang asawa niini nga kanhi Miss Universe Philippines nga si Rachel Peters.
Ang salo-salo sa kasal nagsilbi usab nga sayo nga selebrasyon alang sa ika-50 nga adlawng natawhan ni Chua, kinsa magsaulog niining mahinungdanong adlaw karong Nobyembre.
