Gipadayag ni Dr. Rene Josef Bullecer, ang Vice President Council of the Laity,
nga ang naandan nga pagdala og pagkaon, sigarilyo, ug ilimnong makahubog ngadto sa mga sementeryo alang sa mga minahal nga mitaliwan na, angay nang hunongon ug wagtangon.
Matod ni Dr. Bullecer, ang maong mga buhat ug pagtuo nga ang mga kalag o espiritu mobalik aron mokaon o moinom, dili angay ug supak sa pagtulon-an sa Kristiyanismo.
Gipunting niya nga ang labing mahinungdanong butang nga ikahatag alang sa mga mitaliwan mao ang, ang presensya o pagtambong sa mga sakop sa pamilya; ang padayon nga pag-ampo alang sa kapahulayan sa kalag; ug ang pagdagkot og kandila, nga nagsimbolo sa kahayag, ang kahayag ni Kristo nga mogiya sa mga kalag nga anaa sa purgatoryo paingon sa gingharian sa langit.
Nanawagan usab siya sa mga pari nga, atol sa ilang mga wali karong Nobyembre 1 ug 2, tudloan ug itisok diha sa mga tumuo ang tinuod nga kahulugan sa paghinumdom, ingon man ang hustong pagsabot mahitungod sa pag-ampo alang sa mga minahal nga mitaliwan na.
