Giluwas sa mga personahe sa Philippine National Police (PNP) ang kapin sa 150 ka mga langyaw gikan sa usa ka building sa Pasay City, diin gituohang gipahigayon ang usa ka “parcel scam.”
Nadiskobrehan ang maong operasyon human nakalingkawas ang duha ka Indonesian ug nangayo og tabang sa kapulisan.
Diha-diha gilusad sa kapulisan ang usa ka operasyon, diin ilang nakaplagan lakip sa ubang mga butang ang mga peke nga uniporme sa kapulisan sa Indonesia ug Malaysia.
Matod ni PNP official Gen. Jose Melencio Nartatez Jr., gipuntirya sa grupo ang ilang mga katagilungsod gikan sa Indonesia ug Malaysia. Diin ang modus naglakip sa pagpahibalo sa mga biktima nga aduna silay nadawat nga pakete nga giingong adunay sulod nga mga ilegal nga butang ug gamiton kini nga hulga aron pugson ang mga biktima sa pagbayad og kwarta.
Dugang pa sa opisyal sa PNP, ang mga lider sa maong operasyon naglakip sa usa ka Indonesian ug duha ka Malaysian.
Tungod niini, gimando sa kadagkoan sa PNP ang usa ka hingpit nga imbestigasyon aron masuta kung aduna pa bay ubang mga kakunsabo.
Ang grupo naglihok na sa maong lugar sulod sa kapin sa duha ka bulan.
Sayo niining adlawa, mibisita sa lugar si Interior Secretary Jonvic Remulla, uban ni Pasay City Mayor Emi Calixto, aron susihon ang mga ebidensya ug tan-awon ang mga indibidwal nga gipangdakop.
Sa pagkakaron, nag-andam na ang PNP sa pagpasaka og mga kaso batok sa mga dinakpang suspek.
