Gikumpirma sa kapulisan sa Pasay City nga usa ka gidudahang improvised explosive device (IED) ang nadiskobrehan duol sa Senado karong buntaga, Lunes, Hulyo 27, atol sa pagbukas sa Ikaduhang Regular Session sa Ika-20 nga Kongreso.
Nahitabo ang pagkadiskobre sa gidudahang IED pipila ka oras sa wala pa ang gikatakdang ikalimang State of the Nation Address (SONA) ni Presidente Ferdinand “Bongbong” Marcos Jr., nga magsugod alas 4:00 sa hapon.
Sumala sa report sa kapulisan, usa ka empleyado sa towing service ang nakakita sa maong IED sa center island sa Diokno Boulevard pasado alas 8:00 sa buntag.
Dayon nga niresponde ang bomb disposal team sa Pasay City Police Station ug luwas nga na-neutralize ang gidudahang eksplosibong aparato.
Lakip sa mga butang nga narekober sa lugar ang usa ka blasting cap, usa ka 9-volt nga baterya, usa ka orasan, ug usa ka sudlanan nga adunay gidudahang eksplosibong materyal.
Padayon karon ang imbestigasyon sa kapulisan aron mahibal-an ang gigikanan sa maong aparato ug ang posibleng mga responsable sa pagbutang niini.
