CENTRAL VISAYAS- Gipasiugda sa Department of Health Region 7 (DOH-7) ang kamahinungdanon sa hugot nga pagpatuman sa Executive Order No. 51, Series of 1986, o mas nailhang Milk Code.
Kini nga polisiya naglatid sa mga lagda bahin sa pagbaligya, pag-anunsiyo ug pagpasiugda sa mga kapuli sa gatas sa inahan ug uban pang produkto alang sa mga masuso.
Tumong niini nga mapanalipdan ug mapalambo ang breastfeeding, lakip ang pagpugong sa dili hustong pagpamaligya sa mga produkto nga mahimong makaimpluwensya sa desisyon sa mga inahan bahin sa pagpasuso.
Atol sa usa ka forum sa Central Visayas, gipasiugda ang responsibilidad sa mga propesyonal sa panglawas sa paghatag og tukma ug siyentipikong impormasyon ngadto sa mga inahan ug ilang pamilya.
Sa pakighinabi sa Bombo Radyo Cebu, gipatin-aw ni Fredric Carl L. Te, Nutrition and Breastfeeding Program Coordinator sa DOH-7, nga hugot nga gilimitahan sa Milk Code ang pag-anunsiyo ug pag-apod-apod sa mga kapuli sa gatas sa inahan, ilabina sulod sa mga ospital ug pasilidad sa panglawas.
Dugang pa ni Te, kinahanglan nga tukma ug kasaligan ang impormasyon nga ihatag sa mga tiggama ug tig-apod-apod, ilabina bahin sa mga benepisyo sa breastfeeding ug sa hustong paggamit sa mga kapuli niini kon gikinahanglan.
Gipasiugda sa Department of Health (DOH-7) ang importante nga papel sa mga health worker sa paghatag og hapsay nga giya sa mga inahan bahin sa benepisyo sa eksklusibong breastfeeding.
Tungod niini, nagpahigayon og forum ang DOH-7 kauban ang mga representante gikan sa nagkadaiyang local government units (LGUs) sa Central Visayas, lakip ang Cebu City, aron mapalawom ang pagpatuman sa probisyon sa Milk Code.
Isip pagtapos sa kalihokan, mipirma sa usa ka pledge of commitment ang mga partisipante isip simbolo sa ilang padayong suporta sa pagpanalipod ug pagpalambo sa breastfeeding.
