Nagpagawas og pahimangno ang Philippine National Police (PNP) batok sa nagkalain-laing matang sa scam ug kriminal nga mga kalihokan samtang nagkaduol ang kapaskohan sa nasud.
Gipasiugda ni PNP Chief Police Brig. Gen. Jose Melencio Nartatez Jr. nga kinahanglan magpabiling mabinantayon ang publiko batok sa mga tawong mahimong mopahimulos sa kadaghanan atol sa holiday season.
Gitambagan sa kapulisan ang publiko nga susihon una ang pagkalehitimo sa mga travel agency ug mga booking sa bakasyon sa dili pa mobayad.
Giawhag usab ang tanan nga dili basta-basta mohatag sa ilang personal ug pinansyal nga impormasyon ngadto sa mga wala mailhi nga indibidwal aron malikayan nga mabiktima sa pagpanglimbong.
Dugang pa, giawhag sa PNP ang publiko nga ireport dayon ang bisan unsang kadudahang kalihokan pinaagi sa emergency hotline nga 911.
