Nanawagan si Pope Leo XIV sa Simbahang Katolika nga padayon nga palig-onon ang mga programa alang sa pag-abiabi, pagpanalipod ug pagtabang sa mga migrante, refugee, ug mga tawo nga mibalik sa ilang mga yutang natawhan.
Sa iyang mensahe alang sa Plenary Meeting sa International Catholic Commission for Migration, giawhag sa Santo Papa ang mga partisipante nga respetuhon ug panalipdan ang kinaiyanhong dignidad sa matag tawo.
Gidasig usab niya ang pakigtambayayong sa nagkadaiyang relihiyosong organisasyon ug mga grupo sa katilingban aron mas mapalapad ang tabang ug suporta alang sa mga nanginahanglan.
Gipasiugda usab ni Pope Leo XIV ang panginahanglan sa pagpangita og bag-ong mga pamaagi aron mapanalipdan ang mga bata nga napugos sa pagbiya sa ilang mga panimalay tungod sa gubat ug mga kalamidad.
