Gipatubag sa Traffic Enforcement Agency of Mandaue ang 30-anyos nga amahan human mikaylap sa social media ang video sa iyang 8-anyos nga anak nga nagluhod sa luyo samtang nagsakay ug nagdagan nga motorsiklo nga walay helmet sa Barangay Tawason, Mandaue City.
Mitunga sa TEAM office si Rey Cañete Rosaceña aron ipatin-aw ang iyang bahin sa insidente nga nahitabo niadtong November 16.
Matud ni Rosaceña nga gikan siya sa merkado ug pauli na sa ilang balay uban sa iyang anak nga iyang gikuha gikan sa eskwelahan human sa klase.
Gisaysay niini nga nasamdan ang bata human madakin-as, hinungdan nga mihubag ug nasakitan ang sampot niini, ug naglisod ang bata nga maglingkod sa motorsiklo.
Busa, iyang gipakupot kini sa iyang liog aron dili kini mahulog, apan giangkon ni Rosaceña nga sayop gihapon ang iyang nahimo ug nangayo og pasaylo kang TEAM head Hyll Retuya.
Sa iyang pag-atubang sa ahensya, gidawat ni Rosaceña ang responsibilidad sa insidente ug miingon nga nakat-on na siya sa iyang sayop.
Subay niini, subling gipahinumdoman ni Retuya ang mga motorista nga dili angay i-kompromiso ang kaluwasan sa ilang mga pasahero, ilabina sa mga bata, bisan pa og duol lang ang destinasyon o adunay personal nga rason ang drayber.
Gihisgotan usab sa TEAM chief ang mga paglapas sa traffic rules nga sagad mahitabo sa interior roads ug mga hilit nga dalan sa Mandaue City, diin adunay mga motorista nga mogamit niini aron malikayan ang mga traffic enforcer sa main roads.
Matod niya, adunay labing menos lima ka deputized barangay tanod sa matag usa sa 27 ka barangay sa Mandaue, dugang sa deputized police personnel, apan adunay pipila nga magduha-duha sa pagdakop sa mga violator tungod kay kaila nila kini isip mga silingan.
Busa, giawhag ni Retuya ang mga barangay tanod, deputized man o dili, nga motabang sa pagreport ug pagpatuman sa mga traffic rules sa ilang tagsa-tagsa ka komunidad. via Bombo Jemmaica Mayot








