CEBU CITY — Napaglantawan ni Cebu City Councilor Dave Tumulak nga dili pa andam ang dakbayan sa Sugbo kun moigo ang mga dakong katalagman sama lang sa nahitabong linog sa Mindanao.
Sa pagpakighinabi sa Bombo Radyo kang Tumulak, kini nagkanayon nga dili pa makaingon nga andam ang mga Sugbuanon kung disaster preparedness ang hisgutanan.
Misugyot si Tumulak nga palapdan pa ang information dissemination ngadto sa katawhan aron masayud kung unsay angayang buhaton sa panahon sa katalagman.
Mabuhat kini pinaagi sa mga efforts sa City Disaster Risk Reduction and Management Office (CDRRMO) ingon man ang kooperasyon sa katawhan.
Gikatakdang mobyahe si Tumulak sa Cotabato aron sa pagsuta sa kahimtang sa katawhan human naigo sa sunud-sunod nga linog.
Sa kasamtangan, gi-assess pa sa Cebu City Government kung unsang hinabang ang ilang mahatag alang sa mga apektadong residente.
Myembro si Tumulak sa committee on disaster risk reduction and management sa City Council.
