CEBU CITY – Natagak ang usa ka babaye gikan sa ika-24 nga andana sa usa ka condominium sa IT Park, Barangay Apas, dakbayan sa Sugbo, kaganihang kadlawon.
Giila lang ang biktima sa pangalan nga “Eva”, 22 anyos, ug adunay live-in partner nga usa ka Taiwanese national.
Gisaysay ni Police Staff Sergeant Ador Bacalso sa Mabolo Police Station nga kauban sa biktima ang Taiwanese national sa dihang nahitabo ang insidente.
Matud pa nga nahinabi sa ilahang imbestigador ang mga construction worker sa atbang nga building sa condo ug giingong nakita nila nga gi-ablihan sa babaye ang bintana ug gani naghubo pa kini tanan ug milingkod sa ‘canopy’ sa aircon apan naligas kini ug nahulog.
Giangkon usab sa langyaw nga naglalis sila sa iyahang live-in partner una nahitabo ang insidente.
Sa pagkakarun, gipalagman pa sa kapulisan ang ilahang imbestigasyon ug kung wala ba’y foul play nga nahitabo.
Anaa na usab sa punerarya ang patay’ng lawas sa biktima, samtang gipaabot ang ang ipahigayon nga otopsiya.
