Nangayo og dugang panahon ang abogado sa mga biktima sa war on drugs ni kanhi Presidente Rodrigo Duterte sa pagtubag sa hangyo sa kampo ni Duterte nga i-disqualify si ICC Chief Prosecutor Karim Khan.
Sa gipagawas nga upat ka panid nga dokumento sa International Criminal Court (ICC) niadtong Agosto 15, si Paolina Massidda sa Office of the Public Counsel for Victims (OPCV) nagkanayon nga wala dayon nila makuha ang mga dokumento nga gigamit sa depensa nga basehanan sa reklamo.
Matod niya, gihatagan lang sila og access niadtong Agosto 11, lima ka adlaw human gisang-at sa depensa ang petisyon niadtong Agosto 6. Busa, nihangyo siya nga ang deadline magsugod sa pag-ihap gikan sa petsa nga nadawat ang mga dokumento.
Samtang, ang abogado ni Duterte nga si Atty. Nicholas Kaufman, niila sa pagka-abli ni Khan sa pagbutyag sa bisan unsang posibleng conflict of interest, apan ang kampo ni Duterte niinsistir gihapon nga kinahanglang ma-disqualify siya tungod sa iyang kanhing tahas isip abogado sa usa sa mga biktima.
Sa pagkakaron, si Khan kasamtangang nagbakasyon tungod sa managlahing mga alegasyon sa sexual misconduct.
Kahinumdoman usab nga ang defense kaniadto nihangyo nga i-disqualify ang duha ka mga maghuhukom sa ICC Pre-Trial Chamber I, apan gisalikway kini sa korte sa wala pa ang gikatakda nga pagkumpirma sa pagdungog sa mga kaso kaniadtong Setyembre 23, may kalabotan sa mga krimen batok sa katawhan nga gisang-at batok sa kanhing presidente, nga natanggong sa The Hague, Netherlands sukad kaniadtong Marso 14.
