Gidayeg sa Armed Forces of the Philippines (AFP) ang Atin Ito Coalition human sa malampusong pag-abot niini sa Pag-asa Island ug pag-isa sa bandila sa Pilipinas sa Sandy Cay sa West Philippine Sea niining semanaha.
Matod ni Rear Admiral Roy Vincent Trinidad, tigpamaba sa AFP alang sa WPS, kini nagpakita sa lig-on nga espiritu sa katawhang Pilipino ug usa ka klarong pag-angkon sa soberanong katungod sa nasud.
Gipasiugda usab sa AFP nga ang malinawon nga presensya sa grupo nagpalig-on sa tingog sa mga mangingisda ug lokal nga komunidad nga nagsalig sa lugar alang sa ilang panginabuhi.
Gisubli sa AFP ang suporta niini sa malinawon ug rule-based nga mga lakang subay sa 2016 Arbitral Award.
Ang ikaupat nga misyon sa Atin Ito naggamit sa M/V Felix Oca ug maghatud og pagkaon, gasolina, medikal nga outreach, ug usa ka konsyerto sa komunidad hangtod karong Mayo 5.
