Giinsister sa Armed Forces of the Philippines (AFP) nga ang mikaylap nga taho nga ang China giingong ang tag-iya sa Batanes dili lang usa ka “isolated academic opinion” nga kalit lang mitumaw karon.
Sa usa ka eksklusibong interbyu sa Bombo Radyo, gipasiugda ni Rear Admiral Roy Vincent Trinidad, ang AFP Special Spokesperson alang sa West Philippine Sea, nga ang maong propaganda konektado mismo sa “partido komunista” sa maong langyaw nga nasud.
Matud niya, kining yano nga pamahayag gikan sa China dili na bag-o ug aduna kini susamang katuyoan sa illegal nga pag-angkon sa teritoryo sa West Philippine Sea.
Tungod niini, nanawagan ug nihangyo si Trinidad sa mga Pilipino nga magmatngon ug seryosong sutaon kining matanga sa mga lakang aron ang publiko makaapil sa pagsukol sa mga bakak nga asoy bahin sa teritoryo sa nasod.
Nagtuo usab ang opisyal nga ang bag-ong asoy usa lamang ka inisyal nga lakang sa mas lawom ug mas dako pang plano sa China.
Gitumbok niya nga kabahin kini sa makadaot nga impluwensya nga dugay na nga gihimo sa maong langyaw nga nasud dinhi sa Pilipinas, hinungdan nga dako ug mahinungdanon kaayo nga makahimo og dinaliang aksyon ang kagamhanan sa labing daling panahon.
