CEBU CITY-Gitataw ni Konsenal Niña Mabatid nga wala siya mag-ingon nga dunay nagpositibo sa COVID-19 sa Sugbo sa iyang facebook post inay ang giingon niini ‘suspected’ covid-19 case.
Kini ang nahimong tubag sa konsehal sa pakighinabi sa Bombo Radyo Cebu atol sa Zona Libre Program human nga kini pa-imbestigaran sa PRO-7 diin gikonsiderar nga fake news ang iyang gipost.
Nagkanayon ang konsehal nga isip usa ka public official, nagpakabana lamang kini sa mga Sugbuanon ug ang iyang gitumbok nga suspected case ang gihulagway sa konsehal nga first hand information human usab nga midangop kaniya ang pamilya niini og nagpatabang aron ipa-cremate ang namatay human giingong makatakod ang sakit niini.
Dako ang pagtoo ni Mabatid nga ang iya na usab kontra sa politika ang nagpadako niini. Igo lang matud pa siya nga mitabang, apan siya pa ang nahimong daotan.
Dugang pa ni Mabatid nga ang iyang intensyon sa post niini nga boot niya og lock down mao nga ang katawhan musunod sa gobyerno sanglit dili matud pa andam ang Sugbo ingon man ang Pilipinas kung ugaling mugrabe ang COVID-19 kung daghan na unya ang mataptan.
Samtang kaganihang hapon nangdis-infect si Mabatid sa Brgy. Talamban ning dakbayan agi og abag ug pagtabang sa pakigbatok sa COVID-19.
Sigon sa konsehala nga iyang kwarta ang gipalit sa kemikal sa pagdis-infect isip tabang niya, pero aduna sa gihapoy pipila ang mibatikos niini butang nga wala na tagda pa sa opisyal.
