CEBU CITY-Nagpasalamat karon ang fraternity nga Alpha Kappa Rho (Akrho) sa City Director sa Lapu-lapu City PNP nga si PCol. Carlito Baja human nga gi-relibohan niini ang mga pulis nga nangulata sa duha ka miyembro sa Akrho kung diin nakuhaan og video ug nagviral pa.
Kini ang gibutyag ni Mr. Richard Buscayno, ang Board of Trustee sa Akrho human usab nga ilang na-istorya si Baja ug mipasalig kini ngadto nila nga magpahigayon kini og patas nga imbestigasyon. Makatarunganon lang usab matud pa nga i-relibo ang mga involve nga mga pulis sanglit under investigation kini.
Gitino usab ni Buscayno nga naabot na ang video sa national level hinungdan nga gipalawman niini karon ang imbestigasyon.Karong adlawa usab nakatakda nga mupiyansa ang dinakpan nga si Paul Jay, ang presidente sa Akrho ug ingon man ang kauban niini.
‘Move on na’
Wala gikompirmar ni Mr. Buscayno, kung tinood ba nga dunay 50 mil pesos nga dala ang member sa Akrho sa dihang gidakop sa Lapu-Lapu PNP ug 12 mil nalang ang nahabilin. Apan gitataw niini nga kang Paul Jay kadto nga kwarta, apan gi-angkon nga duna na kini gigasto hayan dili pa masuta kung naibanan pa gyud kini sa mga pulis.
Samtang, giklaro usab niini nga ang gubot nga nahitabo sa maong concert nga maoy giingong maoy hinungdan nga miresponde ang Lapu-Lapu PNP ang ulahi na nahitabo. Una matud pa nga nahitabo ang pagsikop sa lalaki sa gawas sa venue sa concert kinsang nakita sa video tungod kay nangulata kini og indibidwal nga natulog sulod sa usa ka sakyanan ug ang concert niadtong higayona, wala matud pa magsugod.
Gani kung wala pa masikop ang mga opisyales sa Akrho, gihimug-atan ni Buscayno nga dili gyud unta siguro magkagubot.
Hangyo nalang karon ni Buscayno sa mga kauban niini nga huwaton nalang ang desisyon sa korte human napasaka na ang kaso ug mag ‘move on’ nalang.
