CEBU CITY — Nimando na si Cebu City Mayor Edgardo Labella og “lockdown” sa Alaska, Mambaling gumikan sa pagsaka sa kaso sa COVID-19 sa lugar.
Matod sa Mayor nga nag-istorya na sila ni Brgy. Mambaling Kapitan Genes Abellana kalabot sa pagpa-ubos sa lugar sa “lockdown”.
Sigon ni Labella nga andam usab ang lokal nga pangagamhanan sa dakbayan sa Sugbo alang sa paghatag og tabang sa mga apektadong residente.
Gikonsiderar na nga epicenter sa COVID-19 case sa dakbayan ang lugar diin dako ang ihap niini.
Kini nunot na sa nagkasakang kaso sa COVID-19 sa maong barangay ug anaa sa 539 ang kasamtangang ihap niini.
Mipasalig ang kapitan sa Barangay Mambaling, dakbayan sa Sugbo nga tabangan ang mga residente sa Alaska Mambaling.
Matud ni Kapitan Gines Abellana nga ipanghatag ngadto sa mga residente ang 800 ka sakong bugas gikan sa City Government, bisan pa man og aduna silay gi-andam nga inisyal nga hinabang gikan sa pondo sa barangay.
Samtang mas gipahugot nga seguridad ang gipatuman sa tibuok Alaska Mambaling human gipalibutan ang mga utlanan niini sa mga sakop sa kapulisan.
Sa pagkakaron, anaa na sa 1,388 ang total confirmed cases sa COVID-19 sa tibuok dakbayan sa Sugbo, base na sa talaan sa Cebu City Health Department.
