CEBU CITY — Gikumpirmar sa Cebu City Government nga ipaubos sa “hard lockdown” ang Sitio Alaska, Brgy. Mambaling, sa dakbayan sa Sugbo, subay na sa nagkagrabeng epekto sa COVID-19.
Matud sa tigpamaba sa mayor nga si Atty. Rey Gealon nga mas pahugtan pa ang seguridad sa Sitio Alaska diin mas daghang mga sakop sa kapulisan ang magbantay.
Kini human nga nanggawas ang mga taho kalabot na sa giingong pagkabadlungon sa mga residente kinsang wala nisunod sa mga lockdown guidelines.
Dugang pa ni Gealon nga daghang mga pulis ang nagpalibot sa maong lugar, ilabi na kadtong mga nagpuyo duol sa taytayan diin daghan, matud pa, ang maglangoy-langoy bisan pa man sa “stay at home order” sa mayor.
Gihimug-atan sa tigpamaba nga wala nay laing tinguha si Mayor Edgardo Labella mao ang kaluwasan sa mga Sugbuanon pinaagi sa pagsunod sa mga health protocols sama lang sa pagsul-ob og face mask ug physical distancing.
Nag-una ang Barangay Mambaling sa labing daghang kaso sa COVID-19 kung diin anaa na sa 629 ang ihap sa mga natakdan sa maong sakit.
