CEBU CITY-Nag-atubang karon ug kasong pagpanglugos sa usa ka 14-anyos nga anak sa iyang kapuyo ang usa ka 36-anyos nga Ama-Ama nga usa ka pet groomer sa Brgy San Vicente, lungsod sa Liloan.
Giingong iyang gipahimuslan ang biktima sulod sa ilang panimalay atubangan sa 3-anyos nga igsuon niini.
Base sa imbestigasyon sa Women and Children Protection Desk sa Liloan Police Station nga nakalugar pagbuhat sa iyang daotang binuhatan ang akusado human nga ang kapuyo niini sayong nilakaw niadtong Oktobre 30 aron mo serve sa milabayng Barangay ug Sangguniang Kabataan SK Election.
Giingong natintal matod pa ang akusado kay nag short ang biktima niadtong tungora.
Nasayran nga pagkagabie sa Oktobre 29 buot unta makighilawas ang akusado sa iyang kapuyo apan wala sila makalugar gumikan kay miabot ang 14-anyos nga biktima sa ilang panimalay.
Ang panimalay nga gipuy-an sa akusado ug sa kapuyo niini lakip na ang mga anak sa iyang kapuyo walay kwarto ug tupad ra sila tanan nga mangatulog.
Posible matod pa nga ang 14-anyos nga biktima ang gipahimungtan sa akusado nianang pagkabuntag gumikan kay wala kini makahilabot sa iyang kapuyo nianang gabie.
Ang biktima base sa pagpahiling sa pink room sa Vicente Sotto Memorial Medical Center VSMMC positibo gayud nga nahilabtan sa akusado.
