Gihimakak ni Dr. Elisse Nicole Catalan, anak ni Cebu Governor Pam Baricuatro, ang mga pasangil nga nanggawas batok sa iyahang inahan may kalabotan sa giingong pag-impluwensya niini sa mga representante sa Sugbo aron suportahan ang impeachment batok kang Bise Presidente Sara Duterte.
Pinaagi sa usa ka social media post, gipahayag sa doktora ang iyahang kasuko sa matud pa “sobra” na nga pagpangdaot ug pagpakaylap og sayop nga impormasyon batok sa gobernador.
Gihagit ni Catalan ang mga kritiko nga mopakita og ebidensya sa maong pasangil samtang nanumpa siya nga walay kamatuoran ang alegasyon nga nanawag ang iyahang inahan sa mga kongresista alang sa maong katuyoan.
Sumala pa kaniya, dili siya mahimong maghilom samtang gina-bully ang iyahang inahan pinaagi sa mga “false narratives.” Gikumpara pa niini ang iyahang baruganan sa gibuhat ni VP Sara ngadto sa iyahang amahan, dungan sa pag-ingon nga isip anak, mobarug usab siya alang sa iyang inahan.
Gisaysay usab sa anak sa gobernador ang sakripisyo ug kakugi ni Gov. Baricuatro sukad sa paglingkod niini sa pwesto bisan pa man sa mga pagbiaybiay gikan sa mga troll farms.
Gitino ni Catalan nga ang prayoridad sa gobernador mao ang pagserbisyo sa tanang Sugboanon ug dili lamang sa usa ka pundok, samtang gipaniguro nga nagpabiling nakatutok ang iyang inahan sa trabaho taliwala sa nagkadaiyang pag-atake sa online platforms.
